گلگت: (رائیٹ ناوٴ نیوز) صدر مملکت آصف علی زرداری نے گلگت بلتستان کے 78ویں یوم آزادی کی تقریب میں کہا ہے کہ مقبوضہ کشمیر کی آزادی وقت کی ضرورت ہے جبکہ بھارت میں مسلمانوں سمیت اقلیتوں پر مظالم کا سلسلہ جاری ہے۔ انہوں نے مزید کہا کہ گلگت بلتستان کے عوام ملکی ترقی کے لیے شانہ بشانہ کھڑے ہیں اور یہاں کے پہاڑ معدنیات سے مالا مال ہیں۔

صدر مملکت نے تقریب میں پریڈ کا معائنہ کیا اور گورنر گلگت بلتستان کی طرف سے روایتی ٹوپی پہنائی گئی۔ اپنے خطاب میں انہوں نے کہا کہ یکم نومبر 1947 کو گلگت بلتستان کے عوام نے عظیم قربانیاں دے کر آزادی حاصل کی اور ان کی جدوجہد کو سلام پیش کرتے ہیں۔

صدر زرداری کی آمد پر گورنر سید مہدی شاہ، وزیر اعلیٰ گلبر خان اور 10 کور کے کمانڈر نے ان کا استقبال کیا جبکہ بچوں نے پھولوں کا گلدستہ پیش کیا۔