گھوٹکی: (رائیٹ ناوٴ نیوز) سندھ کے ضلع گھوٹکی میں گنے کے کاشتکاروں نے شوگر ملز کی جانب سے مقرر کردہ 400 روپے فی من نرخ کو مسترد کر دیا ہے۔ اوباڑو میں کسانوں نے احتجاجی ریلی نکالی اور اپنی معاشی مشکلات کا اظہار کیا۔

کسان رہنما آفتاب مزاری نے کہا کہ چینی کے نرخ 240 روپے فی کلو ہیں جبکہ گنا 400 روپے فی من خریدنا کسانوں کے لیے نقصان دہ ہے۔ انہوں نے کہا کہ موجودہ مہنگائی میں کوئی زمیندار اس نرخ پر گنا فروخت نہیں کرے گا، جب کہ ڈی اے پی، ڈیزل اور یوریا کی قیمتیں بھی زیادہ ہیں۔

دوسری طرف، ضلع سجاول کی تین شوگر ملیں ابھی تک بند ہیں جس کی وجہ سے کرشنگ شروع نہیں ہوسکی اور کسانوں کو مشکلات کا سامنا ہے۔ کین کمشنر پنجاب نے اعلان کیا ہے کہ آج 14 ملوں کا معائنہ کیا جائے گا۔

ملک میں چینی کی اوسط قیمت ایک سال قبل 132 روپے 24 پیسے فی کلو تھی، جو ادارہ شماریات کے مطابق اب بڑھ چکی ہے۔