اسلام آباد: (رائیٹ ناوٴ نیوز) پی ٹی آئی رہنما بیرسٹر گوہر نے کہا ہے کہ بانی پی ٹی آئی عمران خان کے خلاف تمام کیسز سیاسی بنیادوں پر بنائے گئے ہیں اور ان کا کوئی حقیقی جواز نہیں۔ ان کا دعویٰ ہے کہ عدالتوں سے اب تک انصاف نہیں ملا۔

بیرسٹر گوہر خان نے مزید کہا کہ سپریم کورٹ میں عمران خان کی صحت سے متعلق درخواست دائر کی گئی ہے اور امید ہے کہ جمعہ کو کیس کی سماعت ہوگی۔ ان کا مطالبہ ہے کہ چیف جسٹس اس کیس کو سنیں اور حکم دیں کہ عمران خان کا علاج شفاء انٹرنیشنل ہسپتال میں ان کے ذاتی معالجین اور خاندان کی موجودگی میں کیا جائے۔

پی ٹی آئی رہنما نے یہ بھی بتایا کہ عمران خان کو گزشتہ سال 17 جنوری کو سزا دی گئی تھی اور جوڈیشل پالیسی کے مطابق ان کیسز کا فیصلہ 35 سے 60 دن کے اندر ہونا چاہیے تھا، جو ابھی تک نہیں ہوا۔ کل اسلام آباد ہائی کورٹ میں عمران خان کی ضمانت کا کیس پیش ہوگا جس میں پی ٹی آئی کے پارلیمنٹیرین بھی شرکت کریں گے۔