پشاور: (رائیٹ ناوٴ نیوز) وزیر اعلیٰ خیبر پختونخوا سہیل آفریدی نے کہا ہے کہ صرف بانی چیئرمین پی ٹی آئی عمران خان کو ختم کرنے کی کوشش کی جارہی ہے۔ انہوں نے ملٹری آپریشن کے حوالے سے کہا کہ ہم دوبارہ ان مناظر کو دیکھنا نہیں چاہتے، جبکہ آپریشن کا ذکر کرتے ہوئے وہ آبدیدہ ہوگئے۔

وزیر اعلیٰ نے پشاور میں کانووکیشن سے خطاب کرتے ہوئے کہا کہ ہمیں امید ہے کہ طلباء ڈگری حاصل کرنے کے بعد ملک کی خدمت کریں گے۔ انہوں نے انگلش تقاریر کے بجائے اردو میں تقریر کرنے کی ہدایت دی۔

انہوں نے مزید کہا کہ خیبرپختونخوا کو دوبارہ دہشت گردی کی طرف دھکیلنے کی کوشش ہورہی ہے، جو کہ انتہائی افسوسناک ہے۔ بند کمروں میں کیے جانے والے فیصلے خطرناک ثابت ہوسکتے ہیں۔

سہیل آفریدی کا کہنا تھا کہ ملٹری آپریشن سے صوبے کے اسکول، اسپتال اور گھر تباہ ہوئے، لیکن ہم دہشت گردی کے خاتمے کے لیے ایک بار پھر قربانی کے لیے تیار ہیں۔ انہوں نے کہا کہ خیبر پختونخوا کو ترقی کی طرف گامزن کریں گے۔