اسلام آباد: (رائیٹ ناوٴ نیوز) وزیراعظم شہباز شریف نے کہا ہے کہ سرمایہ کاروں کو سہولیات فراہم کرنا حکومت کی اولین ترجیح ہے۔ نیا سال کے پہلے روز منعقدہ اجلاس میں معاشی اصلاحات اور سرمایہ کاری کے فروغ پر تبادلہ خیال ہوا۔ وزیراعظم نے تمام وزارتوں سے مطالبہ کیا کہ وہ بیرونی و اندرونی سرمایہ کاری کے فروغ کے لیے سفارشات جلد از جلد پیش کریں۔ انہوں نے کہا کہ معاشی استحکام کے لیے عملی اقدامات اور جامع حکمت عملی کی ضرورت ہے۔

اجلاس میں وزیراعظم نے زور دیا کہ تمام وزارتیں سرمایہ کاری کے فروغ اور ترقیاتی منصوبوں کے لیے تجاویز مرتب کریں۔ انہوں نے وفاقی و صوبائی حکومتوں کے تعاون کو کلیدی قرار دیتے ہوئے کہا کہ معاشی اصلاحات کے لیے تمام وزارتوں کو ہم آہنگی سے کام کرنا ہوگا۔

وزیراعظم نے ہدایت کی کہ دنیا بھر میں موجود پاکستانی سفارتخانے غیر ملکی سرمایہ کاروں کو سہولیات فراہم کرنے میں مؤثر کردار ادا کریں اور بروقت معلومات فراہم کریں۔ انہوں نے زور دیا کہ صنعتی پیداوار اور زراعت سمیت دیگر شعبوں پر یکساں توجہ دے کر پائیدار معاشی ترقی کو ممکن بنایا جائے۔