اسلام آباد: (رائیٹ ناوٴ نیوز) عالمی مالیاتی فنڈ (آئی ایم ایف) نے اس سال سے 2030 تک کے مالیاتی منظرنامے میں دفاعی اخراجات میں اضافے اور عوامی شعبے کے ترقیاتی پروگرام (پی ایس ڈی پی) میں کمی کی پیش گوئی کی ہے۔

آئی ایم ایف کے اندازوں کے مطابق موجودہ مالی سال میں سود کی ادائیگیاں مجموعی قومی پیداوار (جی ڈی پی) کے 6.5 فیصد تک رہنے کی توقع ہے، جو پچھلے سال 7.8 فیصد تھیں۔ 2030 تک سود کی ادائیگیاں مزید کم ہو کر 4.8 فیصد تک پہنچ جائیں گی۔

پی ایس ڈی پی کے اخراجات جی ڈی پی کے 0.7 فیصد تک محدود رہیں گے، جو اگلے سال 0.6 فیصد تک گر جائیں گے اور 2030 تک اسی سطح پر رہیں گے۔ دفاعی بجٹ، جو 2021 میں جی ڈی پی کا 2.4 فیصد تھا، 2024 میں 1.8 فیصد تک کم ہو گیا تھا، لیکن اس سال 2 فیصد تک بڑھنے کی توقع ہے۔

حکومت نے آئی ایم ایف کو منصوبہ بندی کے معیار کو بہتر کرنے کی یقین دہانی کرائی ہے تاکہ طویل مدتی سرمایہ کاری پر توجہ مرکوز کی جا سکے۔