اسلام آباد: (رائیٹ ناوٴ نیوز)

ملک کے صارفین کے لیے خوش خبری ہے کہ بجلی کی فی یونٹ قیمت میں کمی کا امکان ہے۔ سینٹرل پاور پرچیزنگ ایجنسی (سی پی پی اے) نے نومبر کی ماہانہ فیول ایڈجسٹمنٹ کے تحت بجلی 72 پیسے فی یونٹ سستی کرنے کی درخواست نیشنل الیکٹرک ریگولیٹری اتھارٹی (نیپرا) میں دائر کی ہے۔

نیپرا 31 دسمبر کو اس درخواست پر سماعت کرے گی۔ درخواست میں بتایا گیا ہے کہ نومبر میں ڈسکوز کو 7 ارب 81 کروڑ 30 لاکھ یونٹس بجلی فراہم کی گئی، جبکہ اس کی فی یونٹ لاگت 6 روپے 16 پیسے رہی۔

دستاویزات کے مطابق، نومبر میں بجلی کی پیداوار مختلف ذرائع سے کی گئی جن میں 39.16 فیصد پانی، 9.34 فیصد مقامی کوئلہ، 5.06 فیصد درآمدی کوئلہ، 8.44 فیصد گیس، 8.64 فیصد درآمدی ایل این جی اور 25.23 فیصد جوہری ایندھن شامل ہیں۔

اگر نیپرا درخواست منظور کرتی ہے تو بجلی صارفین کو 72 پیسے فی یونٹ کم قیمت پر دستیاب ہوگی۔