لاہور: (رائیٹ ناوٴ نیوز) امیر جماعت اسلامی پاکستان حافظ نعیم الرحمان نے کہا ہے کہ نواز شریف ستر ہزار حرام ووٹ لے کر قوم پر مسلط ہوئے ہیں اور ان کو لانے والوں کا چالان کون کرے گا۔

لاہور میں مینار پاکستان اجتماع عام کی کمیٹیوں کے کارکنان کے اعزاز میں استقبالیہ سے خطاب کرتے ہوئے حافظ نعیم نے کہا کہ گزشتہ انتخابات میں ن لیگ سترہ سیٹیں بھی نہیں جیت سکی۔ انہوں نے کہا کہ نظام کی تبدیلی کی تحریک نہ صرف حکمرانوں کا چالان کرے گی بلکہ انہیں درست کرے گی۔

انہوں نے مزید کہا کہ چھبیس ویں اور ستائیس ویں آئینی ترمیم سے عدلیہ کو نقصان پہنچا ہے اور جماعت اسلامی ہی نظام کو بدلنے کی صلاحیت رکھتی ہے۔

حافظ نعیم نے کہا کہ 21 دسمبر کو ڈویژن دفاتر میں بلدیاتی ایکٹ کے خلاف دھرنا دیا جائے گا اور آئی پی پیز مافیا کے خلاف تحریک چلائی جائے گی۔

امیر جماعت اسلامی نے پنجاب کے بلدیاتی قانون پر تنقید کرتے ہوئے کہا کہ یہ نظام بارہ کروڑ پر لاگو کرنا چاہتے ہیں، اور غیر جماعتی بلدیاتی الیکشن سے اپنے ورکرز سے خوفزدہ ہیں۔

انہوں نے کراچی میں صفائی کے نظام کی خرابی اور سندھ کے نظام پر بھی تنقید کی اور بیوروکریسی کے نظام کے خلاف کھڑے ہونے کی ضرورت بتائی۔