پاکستان اور برطانیہ کے درمیان ترقیاتی مذاکرات میں دو طرفہ تجارت میں اہم پیش رفت ہوئی ہے۔
اسلام آباد: (رائیٹ ناوٴ نیوز) پاکستان اور برطانیہ کے درمیان ترقیاتی مذاکرات کے آٹھ سال بعد دوبارہ آغاز ہوا، جس میں دو طرفہ تجارت میں اہم پیش رفت ہوئی۔ وفاقی وزیر خزانہ محمد اورنگزیب اور برطانیہ کی وزیر برائے ترقیاتی امور بیرونیس چیپ مین کے درمیان ملاقات میں تجارت، سرمایہ کاری، ماحولیات اور سماجی شعبوں میں تعاون بڑھانے پر تبادلہ خیال کیا گیا۔
پاکستان میں برطانوی کمپنیوں کی تعداد 200 سے زائد ہونے کے باعث تجارتی حجم 5.5 بلین پاؤنڈ سے تجاوز کر گیا ہے۔ مذاکرات میں صحت، تعلیم، آبادی اور ماحولیاتی استحکام میں سرمایہ کاری پر غور کیا گیا اور گرین ٹیکنالوجیز کے فریم ورک میں گرین کومپیکٹ پروگرام کا آغاز کیا گیا۔
بیرونیس چیپ مین اور وزیر تعلیم خالد مقبول صدیقی نے پاک-یو کے ایجوکیشن گیٹ وے کے اگلے مرحلے کا افتتاح کیا، جس کے تحت اسٹارٹ اَپ فنڈ متعارف کروائے گئے اور تعلیمی مواقع میں توسیع کی گئی۔
اس اہم پیش رفت سے پاکستان کی معیشت میں استحکام، سرمایہ کاری میں اضافہ اور عالمی اعتماد کو مزید مضبوط کرنے کی توقع ہے۔
