واشنگٹن: (رائیٹ ناؤ نیوز) امریکی محکمہ خارجہ نے نئی ہدایات کی تجویز دی ہے جس کے تحت امریکا میں پیدا ہونے والے بچوں کے پاسپورٹ کے لیے والدین کو اپنی امریکی شہریت یا قانونی امیگریشن حیثیت کا ثبوت پیش کرنا پڑ سکتا ہے۔ یہ اقدام صدر ڈونلڈ ٹرمپ کی جانب سے شہریت کے دائرہ کار کو محدود کرنے کی کوششوں کا حصہ ہے۔

اس پالیسی کے مطابق والدین کو اپنے بچوں کے پاسپورٹ کے لیے درخواست دیتے وقت اضافی دستاویزات پیش کرنا ہوں گی۔ امریکی شہری والدین کو درست امریکی پاسپورٹ یا پیدائش کا سرٹیفکیٹ دکھانا ہوگا، جبکہ غیر ملکی والدین آئی-94 فارم یا گرین کارڈ پیش کر سکتے ہیں۔

وائٹ ہاؤس نے اس معاملے پر سوالات کو محکمہ خارجہ کی جانب بھیج دیا ہے۔ محکمہ خارجہ کے ترجمان نے کہا ہے کہ ٹرمپ انتظامیہ امریکی شہریت کے تحفظ کے لیے واضح مؤقف رکھتی ہے اور پاسپورٹ کا عمل اسی معیار کے مطابق ہونا چاہیے۔

یاد رہے کہ پیدائشی شہریت امریکا میں آئینی نظام کا حصہ رہی ہے، لیکن ٹرمپ انتظامیہ اس میں تبدیلیاں لانے کی کوشش کر رہی ہے۔ ان تبدیلیوں کا مقصد برتھ ٹورازم کو روکنا ہے، جہاں غیر ملکی افراد اپنے بچوں کی پیدائش امریکا میں کروا کر شہریت حاصل کرتے ہیں۔

تاہم یہ نیا صدارتی حکم عدالت میں چیلنج کیا جا چکا ہے اور ممکن ہے کہ اس پر عمل درآمد روک دیا جائے۔ اس پالیسی کا حتمی فیصلہ عدالتی فیصلوں اور حکومت کی ہدایات پر منحصر ہوگا۔