لندن: (رائیٹ ناؤ نیوز) برطانوی تحقیق کے مطابق زندگی کے ناقابل فراموش لمحات میں شادی اور پہلے بچے کی پیدائش سرفہرست ہیں۔ تحقیق میں 2 ہزار افراد نے حصہ لیا۔ 49 فیصد افراد نے شادی کو جبکہ 47 فیصد نے پہلے بچے کی پیدائش کو یادگار لمحہ قرار دیا۔

تحقیق میں شامل 45 فیصد افراد نے کسی پیارے کے انتقال کو ناقابل فراموش لمحہ قرار دیا۔ مجموعی طور پر 57 فیصد افراد نے خاندان سے جڑے لمحات کو اہم کہا جبکہ کام اور کیرئیر کے لمحات کو صرف 4 فیصد افراد نے خاص قرار دیا۔

محققین کے مطابق زندگی کے مختلف سنگ میل جیسے پہلے گھر میں منتقل ہونا، بچوں کی پیدائش اور تعطیلات پر جانا زندگی کو خاص بناتے ہیں۔ انہوں نے کہا کہ دفتری سرگرمیاں ماضی میں یاد نہیں رہتیں بلکہ خاندان سے جڑی باتیں یاد رہتی ہیں۔

تحقیق میں شامل 90 فیصد افراد نے ان لمحات کو محفوظ رکھنے کی اہمیت پر زور دیا۔ 97 فیصد افراد نے کہا کہ وہ ان یادگار لمحات کو یاد کرنا پسند کرتے ہیں۔

واضح رہے کہ اس تحقیق کے مطابق والدین بننا، پہلا گھر خریدنا اور ڈرائیونگ ٹیسٹ پاس کرنا بھی اہم لمحات میں شامل ہیں۔ یہ نتائج زندگی کے مختلف مواقع کی اہمیت کو اجاگر کرتے ہیں۔