گدو: (رائیٹ ناؤنیوز) گدو 747 میگاواٹ پاور پلانٹ کے اسٹیم ٹربائن کی بحالی کے لیے بین الاقوامی بولیاں طلب کی گئی ہیں۔ ترجمان پاور ڈویژن نے کہا ہے کہ اس سے بجلی کی پیداواری لاگت 13.87 روپے سے کم ہو کر 9.68 روپے فی یونٹ رہنے کی امید ہے۔

ترجمان نے بتایا کہ گدو پاور پلانٹ کی پیداواری صلاحیت میں 297 میگاواٹ کا اضافہ ہوگا، جو موجودہ پیداوار کے مقابلے میں 66 فیصد زیادہ ہے۔

جولائی 2022 کے آتشزدگی واقعے کے بعد اسٹیم ٹربائن-16 اور متعلقہ جنریٹر بند ہیں، جبکہ پلانٹ اس وقت اوپن سائیکل موڈ میں 450 میگاواٹ بجلی پیدا کر رہا ہے۔

واضح رہے کہ مکمل کمبائنڈ سائیکل آپریشن کی بحالی کے بعد پلانٹ 747 میگاواٹ بجلی پیدا کرے گا، جبکہ بحالی کے بعد پلانٹ کی میرٹ آرڈر میں پوزیشن 7ویں نمبر تک بہتر ہونے کی توقع ہے۔

ترجمان پاور ڈویژن کے مطابق تکنیکی جائزے کے بعد پروکیورمنٹ کا عمل شروع کر دیا گیا ہے، اور بولیاں جمع کرانے کی آخری تاریخ 7 اکتوبر 2026 مقرر کی گئی ہے۔