تاشقند: (رائیٹ ناؤ نیوز) ازبکستان نے چین سے J-10CE لڑاکا طیارے خرید کر دوسرا ملک بننے کا اعزاز حاصل کر لیا ہے۔ یہ طیارے ازبکستان کے یوم آزادی کی تقریبات کے موقع پر پہلی بار عوام کے سامنے پیش کیے گئے۔

چینی میڈیا نے بتایا ہے کہ ازبکستان نے 24 J-10CE طیاروں کا آرڈر دیا تھا، تاہم کسی ملک نے اس معاہدے کی سرکاری تصدیق نہیں کی تھی۔ ازبک صدر کے دفتر کی ویڈیو میں چھ طیارے دیکھے جا سکتے ہیں۔

ویڈیو میں ان طیاروں کو رن وے پر فارمیشن میں پرواز کرتے، اور واٹر کینن سلیوٹ حاصل کرتے ہوئے دکھایا گیا ہے۔ اس سے طیاروں کی خریداری کی تصدیق ہو گئی ہے۔

یہ پیش رفت بنگلادیش کے ساتھ چین کے مذاکرات کے دوران سامنے آئی ہے۔ بنگلادیش J-10CE طیارے اور اٹیک ہیلی کاپٹرز خریدنے کا ارادہ رکھتا ہے۔

واضح رہے کہ پاکستان نے سب سے پہلے ان طیاروں کو خریدا تھا، اور انہیں بھارت کے ساتھ جنگ میں استعمال کیا تھا۔ اس سے جدید رافیل طیارے مار گرائے گئے تھے۔