اسلام آباد: (رائیٹ ناؤ نیوز) وزیراعظم شہباز شریف کے مشیر سیاسی امور رانا ثناء اللہ نے کہا ہے کہ افتخار گیلانی کو وزیراعظم آزادکشمیر بنانے کا فیصلہ نواز شریف کا تھا۔ انہوں نے جیو نیوز کے پروگرام میں گفتگو کرتے ہوئے بتایا کہ یہ فیصلہ پارٹی قیادت اور نواز شریف نے مل کر کیا۔

رانا ثناء اللہ نے مزید کہا کہ یہ ایک مشکل فیصلہ تھا لیکن افتخار گیلانی کے حق میں ہوا، کسی کے ساتھ زیادتی نہیں کی گئی۔ انہوں نے کہا کہ شاہ غلام قادر پارٹی کے صدر ہیں اور وہ ہر قیمت پر ساتھ رہیں گے۔

انہوں نے مزید کہا کہ شاہ غلام قادر اور راجا فاروق حیدر کو پارٹی کی ٹیم میں شامل کیا جائے گا۔ ادھر مسلم لیگ ن کے افتخار گیلانی آزادکشمیر کے 17ویں وزیراعظم منتخب ہوئے ہیں۔

افتخار گیلانی نے 30 ووٹ حاصل کیے جبکہ پیپلز پارٹی کے سردار مختار خان نے 14 ووٹ حاصل کیے۔ افتخار گیلانی پہلے 2011 میں منتخب ہوکر آزادکشمیر کی قانون ساز اسمبلی میں پہنچے تھے۔

یاد رہے کہ مسلم لیگ ن کے طارق فاروق 32 ووٹ لےکر اسپیکر منتخب ہوئے جبکہ پیپلز پارٹی کے چوہدری قاسم مجید 14 ووٹ حاصل کرسکے۔ افتخار گیلانی آزادکشمیر کے وزیر تعلیم بھی رہ چکے ہیں۔