اسلام آباد: (رائیٹ ناؤ نیوز) پیپلزپارٹی نے پنجاب میں بلدیاتی انتخابات کی تیاری کے لئے فریال تالپور کو ذمہ داری سونپ دی ہے۔ فریال تالپور نے پارٹی کی بحالی اور انتخابات کی حکمت عملی کے لئے سرگرمیاں تیز کر دی ہیں۔

آصف علی زرداری کی بہن فریال تالپور کو ابتدائی مرحلے میں پنجاب کے بلدیاتی انتخابات کی تیاری کا ٹاسک دیا گیا ہے۔ انہوں نے پنجاب میں پارٹی تنظیموں کے ساتھ بھرپور مشاورت کی ہے۔ ذرائع کے مطابق مریم نواز اور فریال تالپور آئندہ انتخابات میں آمنے سامنے ہوں گی۔

فریال تالپور نے گذشتہ 4 روز میں زرداری ہاؤس اسلام آباد میں پیپلزپارٹی وسطی اور جنوبی پنجاب کی تنظیموں کے ساتھ ملاقاتیں کی ہیں۔ انہوں نے سیاسی صورتحال اور تنظیمی امور پر راجہ پرویز اشرف اور مخدوم احمد محمود سے بریفنگ لی ہے۔

ذرائع کے مطابق فریال تالپور نے پارٹی کے دونوں صوبائی سربراہان کو ہدایت کی ہے کہ بلدیاتی انتخابات میں بھرپور حصہ لیا جائے۔ انہوں نے کہا کہ ہر حلقے میں امیدوار کھڑے کئے جائیں اور پارٹی کو دوبارہ مضبوط کیا جائے۔

یاد رہے کہ ماضی میں پیپلزپارٹی چھوڑنے والے افراد کو واپس لانے کی کوشش کی جا رہی ہے۔ فریال تالپور جلد پنجاب بھر کے دورے پر جائیں گی اور ہر ضلع میں سیاسی طور پر بااثر شخصیات سے ملاقاتیں کریں گی۔