اسلام آباد: (رائیٹ ناؤ نیوز) وفاقی وزیر پارلیمانی امور طارق فضل چوہدری نے کہا ہے کہ بانی پی ٹی آئی کو سیکیورٹی حالات کے باعث شفا ہسپتال لانا ممکن نہیں رہا۔ ان کا معائنہ پمز ہسپتال منتقل ہونے کے بعد ہوا جہاں سپریم کورٹ کے فیصلے کے تحت عملدرآمد کیا گیا۔

طارق فضل چوہدری نے مزید کہا کہ 20 اگست کو بانی پی ٹی آئی کو شفا ہسپتال لانے کی تمام تیاری مکمل کی گئی تھی، اور ڈاکٹرز کا بورڈ تشکیل دیا گیا تھا۔ شفا ہسپتال میں سیکیورٹی انتظامات بھی مکمل کر لیے گئے تھے۔

انہوں نے کہا کہ ڈاکٹروں نے بانی پی ٹی آئی کی صحت کو تسلی بخش قرار دیا اور صبح پانچ بجے وہ پمز سے اڈیالہ جیل روانہ ہوئے۔ بانی کی سیکیورٹی پر کوئی سمجھوتہ نہیں کیا گیا اور حکومت نے اپنی ذمہ داری پوری کرنے کی کوشش کی ہے۔

طارق فضل چوہدری کا کہنا تھا کہ سپریم کورٹ کے فیصلے کے بغیر ہی بانی پی ٹی آئی کی گزشتہ ماہ کے دوران 6 بار معائنہ اور علاج ہوا۔ تحریک انصاف کے دعوے حقائق کے منافی ہیں اور حکومت اپنی ذمہ داری ادا کر رہی ہے۔

واضح رہے کہ بانی پی ٹی آئی کی صحت کے حوالے سے حکومت نے ہمیشہ ذمہ دارانہ پالیسی اپنائی ہے اور کسی بھی غفلت کا مظاہرہ نہیں کیا گیا ہے۔