اسلام آباد: (رائیٹ ناؤ نیوز) بانی پی ٹی آئی عمران خان کو آج اڈیالہ جیل سے شفا انٹرنیشنل اسپتال منتقل کیے جانے کا امکان ہے۔ ذرائع کے مطابق، ان کی اسپتال منتقلی کے انتظامات مکمل کر لیے گئے ہیں۔

سپریم کورٹ نے عمران خان کو دو روز میں شفا اسپتال منتقل کرنے کا حکم جاری کیا تھا اور یہ منتقلی آج ممکن ہے۔ وزیر قانون اعظم نذیر تارڑ کا کہنا ہے کہ یہ کام اسلام آباد انتظامیہ کی ذمہ داری ہے اور وہ مقررہ وقت پر مکمل کریں گے۔

وفاقی وزیر برائے پارلیمانی امور نے کہا ہے کہ عمران خان سے متعلق سپریم کورٹ کے فیصلے پر مکمل عمل کیا جائے گا۔ ان کا کہنا تھا کہ حکومت سپریم کورٹ کے حکم کی تعمیل کرے گی۔

واضح رہے کہ نوازشریف کو بھی جیل سے سرکاری سروسز اسپتال منتقل کیا گیا تھا۔ نوازشریف کا علاج میڈیکل بورڈ کی تجویز پر بیرون ملک ہوا تھا اور حکومت نے اجازت دی تھی۔