اسلام آباد: (رائیٹ ناؤ نیوز) مسلم لیگ ن کے رہنما خواجہ سعد رفیق نے سپریم کورٹ کے فیصلے پر ردعمل دیتے ہوئے کہا کہ عمران خان کی الشفا اسپتال منتقلی اور ان کی بہن سے ملاقات کا عدالتی فیصلہ خوش آئند ہے۔ انہوں نے کہا کہ اس فیصلے سے عدلیہ کا وقار بحال ہوگا۔

سعد رفیق نے سوشل میڈیا پر اپنے پیغام میں کہا کہ اس فیصلے سے ان کے دل کا بوجھ کم ہوا ہے۔ انہوں نے معزز جج صاحبان کو مبارکباد پیش کی اور کہا کہ اگر اس میں ریاستی منشا شامل ہے تو اسے بھی سراہا جانا چاہیے۔

انہوں نے کہا کہ عمران خان کی صحت انتہائی اہم ہے اور اس پر کوئی سمجھوتہ نہیں ہونا چاہیے۔ ان کی جماعت اور اہل خانہ کو محتاط اور ذمہ دارانہ کردار ادا کرنا چاہیے۔

سعد رفیق کا کہنا تھا کہ جیل میں قیدی کی صحت متاثر ہو سکتی ہے، خاص طور پر جب وہ سیاسی مخالف ہو۔ حکومت کو یہ فیصلہ خود کرنا چاہیے تھا، لیکن اب فریقین کو ذمہ داری کا مظاہرہ کرنا چاہیے۔

یاد رہے کہ خواجہ سعد رفیق نے دیگر پی ٹی آئی رہنماؤں کی بھی توجہ کی ضرورت پر زور دیا اور کہا کہ اس موقع پر طعنہ زنی کی کوئی ضرورت نہیں ہے۔