اسلام آباد: (رائیٹ ناؤ نیوز) اسلام آباد ہائیکورٹ میں حج پالیسی 2027 تا 2030 کے تحت نئے حج آپریٹرز کے لیے کوٹہ الاٹ نہ کرنے کے معاملے پر درخواست دائر کی گئی ہے۔ عدالت نے وفاقی حکومت اور وزارت مذہبی امور کو نوٹس جاری کرتے ہوئے جواب طلب کیا ہے۔

عدالت نے حج پالیسی کی تیاری کی دستاویزات اور نئے آپریٹرز کے لیے مقرر کردہ معیار کی تفصیلات طلب کی ہیں۔ عدالت نے نئے حج آپریٹرز کو آئندہ سماعت تک حتمی کوٹہ الاٹ کرنے سے روک دیا ہے، تاہم 21 جولائی کے نوٹیفکیشن کے تحت کارروائی جاری رکھنے کی ہدایت کی ہے۔

درخواست گزاروں کے وکیل نے عدالت کو بتایا کہ رجسٹرڈ حج گروپ آرگنائزرز کو میرٹ لسٹ میں شامل ہونے کے باوجود کوٹہ نہیں دیا گیا۔ انہوں نے کہا کہ سابقہ نظام کے تحت ان کی جانچ پڑتال کی گئی تھی، تاہم انہیں نظرانداز کیا گیا ہے۔

عدالت نے سوال کیا ہے کہ کیا حج پالیسی مجاز اتھارٹی کے تحت تشکیل دی گئی ہے یا نہیں اور پرانے نان کوٹہ رجسٹرڈ آرگنائزرز کو نظرانداز کیا جا سکتا ہے؟ وزارت مذہبی امور سے تفصیلی جواب طلب کیا گیا ہے۔

واضح رہے کہ عدالت نے حج انتظامات کی حساسیت کو مدنظر رکھتے ہوئے کیس کی سماعت 26 اگست تک ملتوی کردی ہے اور متعلقہ فریقین کو جواب جمع کرانے کی ہدایت کی ہے۔