لاہور: (رائیٹ ناؤ نیوز) حکومت پنجاب نے ہوٹلز، ریسٹورنٹس اور کافی شاپس میں کچی رسیدوں کے اجراء پر مکمل پابندی عائد کردی ہے۔ تمام کاروباری مراکز کے لیے قانونی رسید کا اجراء e-IMS سسٹم کے تحت لازمی قرار دیا گیا ہے۔

پنجاب ریونیو اتھارٹی نے کہا ہے کہ رسید پر کاروبار کا نام، پتہ، رسید نمبر اور QR کوڈ درج کرنا ضروری ہوگا۔ کچن آرڈر سلپ یا QR کوڈ کے بغیر کسی بھی رسید کا اجراء غیر قانونی سمجھا جائے گا۔

حکام کے مطابق e-IMS کے بغیر رسید جاری کرنے پر 4 لاکھ سے 10 لاکھ روپے تک جرمانہ عائد ہوگا۔ مسلسل خلاف ورزی پر کاروبار کو ایک ماہ کے لیے سیل کیا جا سکتا ہے۔

یہ اقدام کاروباری شفافیت کو بڑھانے اور سرکاری محاصل کی حفاظت کے لیے اہم ہے۔ اس سے ٹیکس چوری کی روک تھام ممکن ہوگی اور پنجاب کی معیشت میں بہتری آئے گی۔

یاد رہے کہ پنجاب ریونیو اتھارٹی نے سیلز ریکارڈ میں خرد برد یا غیر قانونی عمل کی صورت میں سخت قانونی کارروائی کی وارننگ دی ہے۔ تمام کاروباری مراکز کو ہدایات پر عملدرآمد کا پابند کیا گیا ہے۔