یمن: (رائیٹ ناؤ نیوز) بھارتی تجارتی جہاز بحیرۂ احمر میں پروجیکٹائل حملے کے بعد ڈوب گیا۔ تاہم، کوسٹ گارڈ نے جہاز کے تمام عملے کو بحفاظت بچا لیا۔

یمن کے قریب بحیرۂ احمر میں حملے کے بعد بھارتی پرچم بردار جہاز (ایم ایس وی فیض نورعلیہ) ڈوب گیا۔ جہاز پر 14 افراد سوار تھے جن میں 13 بھارتی شہری اور ایک یمنی شامل تھا۔

بھارت نے اس حملے کی شدید مذمت کی ہے اور اسے بلااشتعال قرار دیا ہے۔ بھارتی وزیرِ جہاز رانی نے کہا کہ جہاز کو یمنی سمندری حدود کے قریب ایک پروجیکٹائل نے نشانہ بنایا۔

بھارتی وزارتِ خارجہ کے ترجمان نے کہا ہے کہ خطے میں تجارتی جہاز رانی کو نشانہ بنانے کا سلسلہ فوری طور پر بند ہونا چاہیے۔

یاد رہے کہ حوثی باغیوں نے سعودی عرب کے خلاف بحیرۂ احمر میں بحری ناکہ بندی کا اعلان کیا تھا اور ماضی میں بھی متعدد حملے کیے ہیں۔