کراچی: (رائیٹ ناؤ نیوز) پاکستانی ٹی وی میزبان متھیرا نے اپنی عمر اور کاسمیٹک سرجری کے حوالے سے پہلی بار کھل کر بات کی ہے۔ انہوں نے کہا ہے کہ وہ اپنی زندگی کے ہر مرحلے پر پُراعتماد ہیں اور عمر چھپانے کی ضرورت محسوس نہیں کرتیں۔

متھیرا نے ایک پوڈکاسٹ میں گفتگو کے دوران بتایا کہ ان کی عمر 34 برس ہے۔ انہوں نے کہا کہ وہ ایمانداری سے بات کرنا پسند کرتی ہیں اور آج بھی خود کو پراعتماد خاتون سمجھتی ہیں۔ ان کے مطابق انسان ہمیشہ جوان نہیں رہ سکتا، اس لیے عمر بڑھنے کو قبول کرنا چاہیے۔

ان کا کہنا تھا کہ شہرت قسمت سے ملتی ہے اور انہوں نے اپنی شناخت خود بنائی ہے۔ متھیرا نے کہا کہ وہ عوامی شخصیت ضرور ہیں، لیکن اپنی نجی زندگی کو ذاتی رکھنا پسند کرتی ہیں۔ وزن یا ظاہری شکل پر تنقید بھی انہیں متاثر نہیں کرتی۔

اداکارہ نے اعتراف کیا کہ انہوں نے کچھ کاسمیٹک سرجریاں کروائی ہیں، جن میں ناک کی سرجری شامل ہے۔ انہوں نے بتایا کہ وہ وقتاً فوقتاً فلرز اور بوٹوکس کا استعمال کرتی ہیں۔

واضح رہے کہ متھیرا نے تقریباً 15 سال قبل لیپوسکشن بھی کروائی تھی۔ انہوں نے کہا کہ خواتین کی عمر بڑھنے کو منفی نہیں سمجھنا چاہیے، کیوں کہ یہ زندگی کا فطری مرحلہ ہے۔