لاہور: (رائیٹ ناؤنیوز) غالب مارکیٹ میں فائرنگ سے پی ٹی آئی رہنما عبداللہ طاہر کے قتل کیس میں پولیس نے 6 سہولت کاروں کو گرفتار کر لیا ہے۔

پولیس ذرائع نے بتایا ہے کہ یہ گرفتاریاں شوٹرز کو سہولت فراہم کرنے کے الزام میں کی گئی ہیں۔ تفتیشی ٹیم کے مطابق ملزمان نے گجرانوالہ سے گاڑی کرائے پر لی تھی جسے پولیس نے ضبط کر لیا ہے۔

ملزمان نے گاڑی حاصل کر کے اس پر جعلی نمبر پلیٹ لگا دی تھی۔ یہ لوگ گاڑی میں گلبرگ تک آئے اور کلینک پر موٹرسائیکلوں پر پہنچے تھے۔

واقعے میں ملوث مرکزی ملزمان تاحال گرفتار نہیں ہو سکے ہیں۔ پولیس ان کی گرفتاری کے لیے کوششیں جاری رکھے ہوئے ہے اور قانون نافذ کرنے والے ادارے شواہد کی روشنی میں مزید تفتیش کر رہے ہیں۔

یاد رہے کہ عبداللہ طاہر کے قتل کے بعد سے علاقے میں خوف و ہراس پھیلا ہوا ہے اور اس واقعے کا سیاسی حلقوں میں بھی شدید ردعمل دیکھنے میں آیا ہے۔