کوئٹہ: (رائیٹ ناؤنیوز) حکومت بلوچستان اور دھرنا کمیٹی کے درمیان معاہدے کی شقوں پر عمل درآمد شروع ہوگیا ہے۔ سرکاری عمارتوں، پولیس سٹیشنوں اور تعلیمی اداروں کو سانحہ زیارت کے شہداء کے نام سے منسوب کرنے کا فیصلہ کیا گیا ہے۔

صوبائی حکومت نے زیارت کے 4 پولیس سٹیشنوں کے نام تبدیل کرنے کی منظوری دی ہے۔ پولیس سٹیشن سرمکسی کا نام شہید حسرت اللہ کاکڑ پولیس سٹیشن رکھا جائے گا۔ دیگر سٹیشنز کے نام بھی شہداء کے ناموں سے منسوب کیے جائیں گے۔

وزیراعلیٰ بلوچستان کے پرنسپل سیکرٹری نے متعلقہ محکموں کو مراسلے جاری کرتے ہوئے ناموں کی تبدیلی کی کارروائی مکمل کرنے کی ہدایت دی ہے۔ سرکاری سکولز اور صحت کے مراکز بھی شہداء کے ناموں سے منسوب ہوں گے۔

اس فیصلے کا مقصد شہداء کی قربانیوں کو یادگار بنانا ہے۔ وزیراعلیٰ بلوچستان سرفراز بگٹی نے کہا کہ حکومت شہداء کے ساتھ کئے گئے وعدوں کو پورا کرنے کے لیے پرعزم ہے۔

یاد رہے کہ بلوچستان حکومت اور دھرنا کمیٹی کے درمیان مذاکرات کامیاب رہے تھے، جس کے نتیجے میں معاہدہ طے پایا تھا۔