کراچی: (رائیٹ ناؤ نیوز) پاکستان ویمن کرکٹ ٹیم کی کپتان فاطمہ ثنا نے کہا ہے کہ کھلاڑیوں کو واضح کر دیا گیا ہے کہ فٹنس اہم ہے۔ انہوں نے کہا کہ فٹنس کے بغیر ٹیم کا حصہ بننا ممکن نہیں۔

نیشنل بینک اسٹیڈیم میں میڈیا سے گفتگو کرتے ہوئے فاطمہ نے کہا کہ پاکستان عالمی ویمن کپ کی میزبانی کر رہا ہے، جو ایک اعزاز ہے۔ انہوں نے کہا کہ ٹی ٹونٹی کپ میں بھرپور کارکردگی دکھانے کی کوشش کی، لیکن نتائج ہمارے حق میں نہیں آئے۔

فاطمہ نے کہا کہ جدید دور میں کھلاڑی کے لئے فٹنس لازمی ہے۔ انہوں نے کہا کہ کھیل کی تکنیک اپنی جگہ مگر فزیکل فٹنس کا کردار اہم ہوتا ہے۔

انہوں نے کہا کہ پاکستان ویمن ٹیم کو سپورٹ کی ضرورت ہے، حوصلہ افزائی سے کھلاڑیوں میں اعتماد بڑھتا ہے۔ ان کا کہنا تھا کہ ٹیم کی کارکردگی بہتر بنانے کے لئے سپورٹ ضروری ہے۔

واضح رہے کہ پاکستان کو عالمی ویمن کپ کی میزبانی ملنا ایک بڑا اعزاز ہے۔ امید ہے کہ تماشائی میدان میں آکر ویمن کرکٹرز کی حوصلہ افزائی کریں گے۔