اسلام آباد: (رائیٹ ناؤ نیوز) پاکستان میں تعینات ایرانی سفیر ڈاکٹر رضا امیری مقدم نے شہید آیت اللہ سید علی خامنہ ای کے جنازے اور خراج عقیدت پیش کرنے کی تقریب میں وزیر اعظم شہباز شریف کی قیادت میں اعلیٰ سطحی پاکستانی وفد کی شرکت پر اظہار تشکر کیا ہے۔ ایرانی سفیر نے کہا کہ پاکستانی وفد کی موجودگی دونوں ممالک کے تاریخی تعلقات، بھائی چارے اور باہمی احترام کی عکاس ہے۔

ڈاکٹر رضا امیری مقدم نے وزیر اعظم شہباز شریف، نائب وزیر اعظم اسحاق ڈار اور فیلڈ مارشل سید عاصم منیر کا شکریہ ادا کیا۔ انہوں نے چیئرمین سینیٹ یوسف رضا گیلانی، اسپیکر قومی اسمبلی ایاز صادق، محسن نقوی اور عطااللہ تارڑ کی شرکت کو بھی قابل قدر قرار دیا۔

ایرانی سفیر نے کہا کہ پاکستان نے اس پُر وقار تقریب میں اعلیٰ ترین سطح پر شرکت کی۔ ان کے مطابق پاکستانی وفد اس موقع پر سب سے نمایاں اور بڑے وفود میں شامل تھا۔

ڈاکٹر رضا امیری مقدم نے کہا کہ پاکستانی وفد کی شرکت پاک ایران دوستی کی مضبوط علامت ہے۔ انہوں نے کہا کہ دونوں برادر ممالک تاریخ کے مشکل اور اہم مواقع پر ہمیشہ ایک دوسرے کے ساتھ کھڑے رہے ہیں۔

ایرانی سفیر نے مذہبی علما، سیاسی شخصیات اور ثقافتی نمائندوں کی شرکت کو بھی سراہا۔ انہوں نے کہا کہ یہ شرکت ایران کے عوام اور حکومت کے ساتھ پاکستان کی یکجہتی کا واضح اظہار ہے۔

واضح رہے کہ پاکستان اور ایران کے درمیان دیرینہ برادرانہ تعلقات قائم ہیں۔ ایرانی سفیر نے دعا کی کہ اللہ تعالیٰ دونوں ممالک کو امن، خوشحالی، عزت اور مضبوط تعلقات سے نوازے۔