کوئٹہ: (رائیٹ ناؤ نیوز) فیلڈمارشل سید عاصم منیر نے کوئٹہ میں حالیہ دہشتگرد حملے پر بیان دیتے ہوئے کہا کہ غیر انسانی اقدامات افواجِ پاکستان یا قوم کے حوصلے کمزور نہیں کرسکتے۔ انہوں نے دہشتگردوں اور ان کے سہولت کاروں کے خلاف پوری قوت سے آپریشنز جاری رکھنے کا عزم ظاہر کیا ہے۔

پاک فوج کے شعبہ تعلقات عامہ کے مطابق فیلڈمارشل عاصم منیر نے عیدالاضحیٰ مغربی سرحدوں پر تعینات جوانوں کے ساتھ منائی۔ وہ بلوچستان کے ضلع ژوب میں پاک افغان سرحد پر اگلے مورچوں تک پہنچے جہاں انہوں نے فوجی افسروں اور جوانوں کے ساتھ نماز عید ادا کی۔

آئی ایس پی آر کے مطابق کوئٹہ آمد پر کور کمانڈر نے ان کا استقبال کیا۔ فیلڈمارشل عاصم منیر نے یادگار شہدا پر حاضری دی اور پھول رکھے۔ انہوں نے مادر وطن کے دفاع میں شہادت پانے والے بہادر سپوتوں کو خراج عقیدت پیش کیا۔

فیلڈمارشل عاصم منیر نے جوانوں کے غیرمعمولی حوصلے اور آپریشنل تیاری کو سراہا۔ انہوں نے جوانوں کی بیرونی سرپرستی میں ہونے والی دہشتگردی کے خلاف ثابت قدمی کی تعریف کی۔ پاکستان کے دیر پا استحکام اور خوشحالی کے لیے خصوصی دعا بھی کی۔

یاد رہے کہ بلوچستان میں حالیہ دہشتگرد حملے کے بعد سیکورٹی فورسز نے آپریشنز کو تیز کر دیا ہے۔ اس کارروائی کا مقصد ملک میں دہشتگردی کا خاتمہ اور امن و امان کی بحالی ہے۔