کراچی: (رائیٹ ناوٴ نیوز) عوام پاکستان پارٹی کے کنوینر شاہد خاقان عباسی نے پیٹرولیم مصنوعات کی قیمتوں پر حکومتی پالیسی کو غلط قرار دیا ہے۔ سابق وزیر خزانہ مفتاح اسماعیل و دیگر رہنماؤں کے ساتھ پریس کانفرنس میں شاہد خاقان نے کراچی کے مسائل پر بھی بات کی۔

انہوں نے کہا کہ سندھ میں 17 سال سے ایک سیاسی جماعت حکومت کر رہی ہے اور صوبے کے مسائل جوں کے توں ہیں۔ عباسی نے کہا کہ 20 سال قبل گلشن اقبال میں ایلیویٹڈ ٹرین کا منصوبہ بنایا گیا تھا، لیکن آج تک پیش رفت نہ ہوئی۔

انہوں نے شہر میں پانی کی فراہمی کی خراب صورتحال پر بھی تشویش کا اظہار کیا۔ سندھ کے دیہی علاقوں کے انفرا اسٹرکچر کی تباہی کا ذکر کرتے ہوئے انہوں نے حکومت سے سوال اٹھایا۔

شاہد خاقان عباسی نے صنعتی علاقوں کے مسائل کو بھی سنگین قرار دیا اور کہا کہ کراچی کے مسائل کا اثر پورے پاکستان پر پڑتا ہے۔ انہوں نے سندھ کے وسائل کی غلط استعمال پر بھی سوال اٹھایا۔

یاد رہے کہ انہوں نے حکومت کی موجودہ پالیسیوں کو عوام پر براہ راست اثر ڈالنے والا قرار دیا اور کہا کہ حکومت کو اپنی پالیسیاں تبدیل کرنے کی ضرورت ہے۔