اسلام آباد: (رائیٹ ناوٴ نیوز) وزیراعظم شہباز شریف نے کہا ہے کہ علاقائی صورتحال کے باوجود بروقت اقدامات کی بدولت توانائی کا بحران پیدا نہیں ہوا۔ انہوں نے انرجی سکیورٹی کے حوالے سے منعقدہ اجلاس میں ملک کی توانائی ضروریات اور بچت اقدامات کا جائزہ لیا۔

وزیراعظم نے اجلاس کے دوران کہا کہ انرجی سکیورٹی ملکی منصوبہ بندی کا اہم حصہ بن چکی ہے۔ انہوں نے خام تیل کے سٹریٹجک ذخائر کے قیام کی ہدایت کی تاکہ مستقبل کی ضروریات کو پورا کیا جا سکے۔

وزیراعظم نے ماحول دوست پالیسیوں پر زور دیتے ہوئے الیکٹرک گاڑیوں (EV) کی حکمت عملی اپنانے کی ہدایت کی۔ انہوں نے شمسی توانائی کے استعمال کو فروغ دینے اور بیٹری سٹوریج کی دستیابی کی اہمیت پر بھی روشنی ڈالی۔

اجلاس میں نیشنل کوارڈینیشن اینڈ مینجمنٹ کونسل (NCMC) کی جانب سے روزانہ کی بنیاد پر صورتحال کا جائزہ لینے کی بریفنگ دی گئی۔ ملک میں پٹرولیم مصنوعات اور غذائی سیکیورٹی مستحکم ہیں۔

واضح رہے کہ حکومت توانائی بحران سے بچاؤ کے لیے مختلف اقدامات کر رہی ہے جن میں مقامی پیداوار میں اضافہ اور بیٹری سٹوریج منصوبے شامل ہیں۔