اسلام آباد: (رائیٹ ناوٴ نیوز) سعودی عرب نے پاکستان کو مکمل مالی تعاون فراہم کرنے کی یقین دہانی کرائی ہے۔ مشکل معاشی حالات میں مدد جاری رکھنے کے عزم کا اظہار کیا گیا۔ سعودی وزیرخزانہ کے دورہ پاکستان میں قرض، ادھار تیل کی سہولت اور اقتصادی تعاون پر بات چیت ہوئی۔

سعودی عرب نے پاکستان کے ساتھ اقتصادی تعاون بڑھانے پر اتفاق کیا ہے۔ وزارت خزانہ کے مطابق، 5 ارب ڈالر قرض اور آئل فنانسنگ سہولت میں توسیع کی درخواست کی گئی۔ تیل کی سہولت مزید 5 سال بڑھانے کی تجویز زیر غور ہے۔

پاکستان کو اس ماہ 4 ارب 80 کروڑ ڈالر کی ادائیگی کا دباؤ ہے۔ ایک ارب 40 کروڑ ڈالر کے یورو بانڈ کی ادائیگی پہلے ہی کی جاچکی ہے۔ زرمبادلہ ذخائر برقرار رکھنے کے لیے مالی مدد ضروری ہے۔

دونوں ممالک نے تجارت، سرمایہ کاری اور معیشت میں تعاون بڑھانے پر زور دیا۔ سعودی وزیرخزانہ نے وزیراعظم شہباز شریف سے ملاقات میں تعلقات کو مزید مستحکم کرنے کی بات کی۔

واضح رہے کہ سعودی وزیرخزانہ محمد بن عبداللہ الجدعان کا دورہ پاکستان دونوں ممالک کی شراکت داری کو مضبوط بنانے کا اشارہ ہے۔ ملاقات میں عالمی بینک اور آئی ایم ایف اجلاس میں دوبارہ ملاقات کی توقع ظاہر کی گئی۔