اسلام آباد: (رائیٹ ناوٴ نیوز) وزیراعظم شہباز شریف نے کہا ہے کہ مشکل حالات میں معاشی طور پر کمزور طبقے کو اکیلا نہیں چھوڑیں گے۔ وہ کمزور اور متوسط طبقے کو مزید ریلیف فراہم کرنے کے لیے کوشاں ہیں۔

اجلاس میں ایندھن ذخائر اور عوامی ریلیف کے اقدامات کا جائزہ لیا گیا۔ انٹیلی جنس بیورو کی آڈٹ رپورٹ بھی پیش کی گئی۔ اجلاس کو بتایا گیا کہ ملک میں ایندھن کے مناسب ذخائر موجود ہیں اور آئندہ کے لیے انتظامات کیے جا رہے ہیں۔

اجلاس میں بتایا گیا کہ ادویات کا وافر ذخیرہ موجود ہے جبکہ ہائی آکٹین ایندھن پر لیوی میں اضافے سے جیٹ فیول کی قیمتوں میں کوئی تبدیلی نہیں آئی۔

وزیراعظم نے عوام سے کہا کہ بچت مہم میں حکومت کا ساتھ دیں اور غیر ضروری سفر سے پرہیز کریں۔ انہوں نے کہا کہ حکومتی اخراجات میں کٹوتی سے سرکاری اخراجات میں کمی کی جا رہی ہے۔

واضح رہے کہ وزیراعظم نے ایندھن کی قیمتوں میں اضافے کو مسترد کر کے بچت اقدامات سے حاصل شدہ رقم کو عوامی ریلیف کے لیے استعمال کرنے کا فیصلہ کیا ہے۔