لندن: (رائیٹ ناوٴ نیوز) عمران خان کے بیٹے قاسم خان نے کہا ہے کہ وہ اور ان کے بھائی سلیمان خان جنوری میں پاکستان کے دورے کا ارادہ رکھتے ہیں اور اس کے لیے ویزا درخواست بھی جمع کروا دی  گئی ہے۔ قاسم نے کہا کہ ان کے والد کو ‘ڈیتھ سیل’ میں رکھا گیا ہے۔

یہ بات انہوں نے اسکائی نیوز کے پروگرام میں انٹرویو دیتے ہوئے کہی۔ ان کا کہنا تھا کہ عدالتی حکم کے باوجود جیل میں ملاقات کی اجازت نہ دینے پر عمران کی بہنوں کے احتجاج کوواٹر کینن سے منتشرکیا جا رہا ہے۔

قاسم اور سلیمان نے بتایا کہ وہ پاکستانی حکومت سے ملاقات کی اجازت حاصل کرنے کی کوشش کر رہے ہیں۔ انہوں نے کہا کہ وزیر دفاع خواجہ آصف نے انہیں پاکستان آنے کی اجازت دی ہے، لہذا وہ جنوری میں دورہ کرنے کا ارادہ رکھتے ہیں۔

قاسم نے کہا کہ عمران خان کا مقصد پاکستان سے کرپشن کا خاتمہ ہے اور وہ اس مقصد کے لیے جدوجہد کر رہے ہیں۔ ان کے مطابق عمران خان کے لیے اپنی زندگی کا مقصد پاکستان کی خدمت ہے اور وہ اس پر قائم رہنا چاہتے ہیں۔

سلیمان نے کہا کہ عمران کو جس سیل میں رکھا گیا ہے، وہ ‘ڈیتھ سیل’ ہے، جہاں روشنی کی کمی ہے اور پانی گندا ہے۔ یہ حالات بین الاقوامی قوانین کےمنافی ہیں۔