اسلام آباد: (رائیٹ ناوٴ نیوز) پاکستان پولٹری ایسوسی ایشن کے خلاف کارٹل کیس میں کمپٹیشن اپیلیٹ ٹریبونل نے کمپٹیشن کمیشن آف پاکستان کے فیصلے کو برقرار رکھتے ہوئے ایسوسی ایشن کی اپیل ختم کر دی ہے، تاہم جرمانے کی رقم 5 کروڑ روپے سے کم کر کے 2 کروڑ 50 لاکھ روپے کر دی گئی ہے۔

ٹریبونل نے سپریم کورٹ کے 2022 کے ایک فیصلے کو مدنظر رکھتے ہوئے جرمانے میں کمی کی ہے اور پولٹری ایسوسی ایشن کو ہدایت کی ہے کہ وہ 15 دن کے اندر جرمانے کی رقم ادا کرے۔

2010 میں کمپٹیشن کمیشن نے پولٹری ایسوسی ایشن پر مرغی کی قیمتوں میں کارٹل بنانے کے الزام میں 5 کروڑ روپے جرمانہ عائد کیا تھا، جس کے بعد طویل قانونی کارروائی جاری رہی۔

2009 میں کمپٹیشن کمیشن نے مرغی کی قیمتوں میں اضافے کی شکایات پر تحقیقات کا آغاز کیا تھا، جس میں ایک دن کے بروائلر چوزوں کی قیمت 6 روپے سے 71 روپے 90 پیسے تک پہنچنے کا انکشاف ہوا۔

ماہرین کا کہنا ہے کہ یہ فیصلہ ماضی کے کیس سے متعلق ہے اور اس کا چکن کی موجودہ قیمتوں پر فوری اثر نہیں پڑے گا۔ جرمانہ کم ہونے کی وجہ سے مارکیٹ پر دباؤ نہیں بڑھے گا۔