اسلام آباد: (رائیٹ ناوٴ نیوز) وزیر مملکت قانون و انصاف بیرسٹر عقیل ملک نے کہا ہے کہ سہیل آفریدی کو جلسوں اور دھرنوں کے بجائے کارکردگی سے مقابلہ کرنا چاہیے۔ انہوں نے وفاقی دارالحکومت میں پریس کانفرنس کرتے ہوئے کہا کہ خیبرپختونخوا میں پی ٹی آئی کی 13 سال سے حکومت ہے اور وہاں اداروں میں خود احتسابی کا عمل جاری ہے۔

بیرسٹر عقیل ملک نے کہا کہ عوام نے ووٹ جلاؤ گھیراؤ اور دھرنوں کے لیے نہیں دیا بلکہ خدمت کے لیے دیا ہے۔ انہوں نے کوہاٹ کے جلسے کو ناکام قرار دیتے ہوئے کہا کہ پنجاب حکومت عوام کی فلاح و بہبود کے لیے اقدامات کر رہی ہے اور وزیراعلیٰ پنجاب مریم نواز دن رات محنت کر رہی ہیں۔

انہوں نے مزید کہا کہ پی ٹی آئی نے خیبرپختونخوا میں کوئی ترقیاتی منصوبہ شروع نہیں کیا، جبکہ وزیراعلیٰ خیبرپختونخوا سے عوام کے مسائل حل کرنے کے لیے اقدامات کرنے کی اپیل کی۔ بیرسٹر عقیل ملک نے کہا کہ اداروں میں خود احتسابی کا عمل جاری ہے اور فیض حمید کو سزا اس کا ثبوت ہے۔