راولپنڈی: (رائیٹ ناوٴ نیوز) علیمہ خان نے کہا ہے کہ بانی پی ٹی آئی اللہ کی حفاظت میں ہیں اور کوئی ان کو نقصان نہیں پہنچا سکتا۔ انسداد دہشت گردی عدالت راولپنڈی میں پیشی کے بعد میڈیا سے بات چیت کرتے ہوئے انہوں نے کہا کہ بانی پی ٹی آئی حق پر کھڑے ہیں اور ان کے خلاف بولنے والوں کے نام معلوم ہیں۔

علیمہ خان نے کہا کہ ٹی وی پر بیٹھ کر نعرے لگانے والے بزدل ہیں، بشریٰ بی بی سے 2 ماہ میں 40 منٹ اور بانی سے ایک گھنٹہ ملاقات ہوئی ہے اور واٹر کینن سے نہیں گھبرائے۔ ان کا کہنا تھا کہ رات کے وقت ہمیں پانی سے حملے کا سامنا کرنا پڑا۔

انہوں نے کہا کہ خواتین کے رات جیل کے باہر ہونے پر اعتراض کرنے والوں کو شرم آنی چاہیے، ہم اپنے حق کے لیے وہاں موجود تھے۔ انہوں نے مزید کہا کہ معدنیات، چینی اور گندم کی تجارت مخصوص لوگوں کے ہاتھ میں ہے اور عوام ان کی غلام ہے۔

علیمہ خان نے کہا کہ ٹی وی اینکرز اُن کے خلاف سزا کی پیشگوئی کرتے ہیں لیکن آئین مجھے اظہار رائے کی اجازت دیتا ہے۔ انہوں نے مزید کہا کہ بانی پی ٹی آئی کی وجہ سے پاکستان کی عزت دنیا میں بلند ہوئی ہے۔