اسلام آباد: (رائیٹ ناوٴ نیوز) اسلام آباد ہائی کورٹ نے وفاقی دارالحکومت کے بلدیاتی الیکشن جلد کروانے کی درخواست پر فیصلہ محفوظ کر لیا ہے۔ جسٹس محسن اختر کیانی نے کیس کی سماعت کی، جہاں درخواست گزار کے وکیل یاسر گردیزی اور الیکشن کمیشن کے ڈی جی لاء ارشد خان پیش ہوئے۔

جسٹس محسن اختر کیانی نے ریمارکس دیئے کہ بلدیاتی الیکشن نہ ہونے کی وجہ سے نظام متاثر ہو رہا ہے، جیسے پراپرٹی ٹیکس لگانے کا عمل رک گیا ہے۔ انہوں نے مزید کہا کہ مسلسل عدالتی فیصلوں کی خلاف ورزی ہو رہی ہے، اور الیکشن کا شیڈول دیے جانے کی ضرورت ہے۔

اسسٹنٹ اٹارنی جنرل عثمان گھمن نے کہا کہ بلدیاتی الیکشن میں تاخیر قانون سازی کی پیچیدگیوں کی وجہ سے ہوئی ہے۔ جسٹس محسن اختر کیانی نے کہا کہ موجودہ پارلیمنٹ آئینی ترامیم میں مصروف ہے، اور ہر غلط قانون کا دفاع نہیں کیا جا سکتا۔

ڈی جی لاء الیکشن کمیشن نے بتایا کہ لوکل گورنمنٹ ایکٹ 2025 میں ترامیم میں پیچیدگیاں ہیں۔ عدالت نے حکومت پر تنقید کرتے ہوئے کہا کہ بلدیاتی نمائندوں کا اختیار سی ڈی اے کو دے دیا گیا ہے، جس پر کوئی توجہ نہیں دی جا رہی۔