پاکستان اور تاجکستان کے درمیان 100,000 ٹن گوشت کی برآمد کا معاہدہ قریب۔
اسلام آباد: (رائیٹ ناوٴ نیوز) تاجکستان نے پاکستان سے 100,000 ٹن گوشت کی درآمد کرنے کا عندیہ دیا ہے، جس کی مالیت 50 ملین ڈالر سے زائد ہے۔ اس ممکنہ درآمدی آرڈر کا مقصد دونوں ممالک کے درمیان بڑھتے ہوئے تجارتی تعاون کی نشاندہی کرنا ہے۔
یہ بات وفاقی وزیر برائے قومی خوراک تحفظ و تحقیق رانا تنویر حسین اور پاکستان میں تعینات تاجکستان کے سفیر یوسف شریف زودا کے درمیان ملاقات میں کہی گئی۔ ملاقات میں تاجکستان کی جانب سے پاکستانی زرعی مصنوعات، خصوصاً گوشت کی درآمد میں دلچسپی ظاہر کی گئی۔
دونوں فریقین نے بڑے پیمانے پر گوشت کی برآمد کے لیے ایک باضابطہ معاہدے کو جلد حتمی شکل دینے پر اتفاق کیا۔ رانا تنویر نے تاجکستان کی ضروریات کو پورا کرنے کے لیے مکمل تعاون کی یقین دہانی کرائی اور پاکستان کی آمادگی کا اظہار کیا۔
ملاقات میں موجودہ تجارتی صورتحال کا جائزہ لیا گیا، جہاں پاکستان تاجکستان کو چاول، ترشاوہ میوہ جات اور آم برآمد کرتا ہے، مگر تجارت کی مقدار ممکنہ حد سے کم رہی۔
دونوں ممالک نے تجارتی حجم کو بڑھانے اور تکنیکی و لاجسٹک رکاوٹوں کو کم کرنے پر بھی اتفاق کیا۔ انہوں نے زراعت میں تعاون کو فروغ دینے کے لیے ایک مستقبل بین روڈمیپ بنانے پر بھی زور دیا۔
