کراچی: (رائیٹ ناؤ نیوز) ڈیفنس، چھوٹا بخاری میں دو خواتین کے جھگڑے کی ویڈیو وائرل ہونے پر ڈی آئی جی ساؤتھ اسد رضا نے انکوائری کا فیصلہ کیا ہے۔ یہ فیصلہ اس وقت کیا گیا جب ویڈیو نے سوشل میڈیا پر توجہ حاصل کی۔

ڈی آئی جی ساؤتھ نے کہا ہے کہ مقدمے کے اندراج کی وجوہات اور حقائق کی مکمل چھان بین کی جائے گی۔ ایس ایس پی انویسٹی گیشن ساؤتھ توحید الرحمان اس معاملے کی انکوائری کریں گے۔

تفتیشی پولیس کے مطابق مقدمے کا چالان ابھی جمع نہیں ہوا جبکہ چھینا جھپٹی اور چوری کی دفعات خارج کردی گئی ہیں۔ پولیس نے کہا ہے کہ اگر جانبداری سامنے آئی تو ذمہ داروں کے خلاف کارروائی ہوگی۔

ذرائع کے مطابق سی سی ٹی وی فوٹیج میں نظر آنے والا سادہ لباس اہلکار مبینہ طور پر کورنگی پولیس کا ہے۔ انکوائری کے دوران فوٹیج میں شامل پولیس اہلکاروں سے بھی پوچھ گچھ کی جائے گی۔

یاد رہے کہ خواتین کے جھگڑے کی ایک اور ویڈیو سامنے آئی ہے جس میں نور العین کو زخمی حالت میں دیکھا گیا، ان کے مطابق ناک اور منہ سے خون بہ رہا تھا۔