اسلام آباد: (رائیٹ ناؤ نیوز) پمز اسپتال میں آتشزدگی کے نتیجے میں 14 معصوم بچوں کی موت پر وزیراعلیٰ پنجاب مریم نواز نے گہرے دکھ کا اظہار کیا ہے۔ انہوں نے کہا کہ یہ المناک واقعہ پورے ملک کو سوگوار کر گیا ہے۔

مریم نواز نے اپنے ایکس اکاؤنٹ پر جاری بیان میں کہا کہ معصوم بچوں کی اچانک موت نے ہر دل کو غمزدہ کر دیا ہے۔ انہوں نے کہا کہ الفاظ میں اس کرب کو بیان کرنا مشکل ہے۔

وزیراعلیٰ پنجاب نے کہا کہ وہ غمزدہ والدین اور لواحقین کے دکھ میں برابر کی شریک ہیں۔ انہوں نے جاں بحق بچوں کے اہلخانہ سے تعزیت کا بھی اظہار کیا۔

یاد رہے کہ پمز سانحہ کے بعد نواز شریف اور بلاول بھٹو سمیت مختلف سیاسی رہنماؤں نے اظہار افسوس کیا ہے۔ انہوں نے ذمہ داروں کے احتساب کا مطالبہ بھی کیا ہے۔

واضح رہے کہ پمز اسپتال میں پیش آنے والے اس حادثے نے پورے ملک کو ہلا کر رکھ دیا ہے، اور عوام میں شدید غم و غصے کی لہر دوڑ گئی ہے۔