ناران: (رائیٹ ناؤ نیوز) خیبر پختونخوا کے مشہور سیاحتی مقام ناران میں ہاٹ ایئر بیلون کا کامیاب تجربہ کیا گیا ہے۔ یہ پرواز سطح سمندر سے تقریباً 8 ہزار فٹ کی بلندی پر کی گئی۔

بیلون میں بیک وقت 5 افراد سوار ہو سکتے ہیں اور یہ سیاحوں کے لیے دلچسپی کا باعث بن سکتا ہے۔ ترکیہ سے تربیت یافتہ ماہرین بیلون کو آپریٹ کر رہے ہیں۔

حکام کا کہنا ہے کہ یہ تجربہ سیاحتی صنعت کو مزید فروغ دینے کا باعث بنے گا۔ مقامی معیشت پر مثبت اثرات متوقع ہیں۔

ماہرین کے مطابق ناران میں ہاٹ ایئر بیلون کی کامیاب پرواز سے سیاحتی مقام کی اہمیت میں اضافہ ہوگا۔ یہ سیاحوں کو نئی تجرباتی سرگرمیوں کی طرف راغب کرے گا۔

یاد رہے کہ گزشتہ سال بسیاں، بالاکوٹ میں بھی ہاٹ ایئر بیلون کا تجربہ کیا گیا تھا۔ یہ تجربات سیاحتی مقامات کی ترقی کے لیے اہم تصور کیے جا رہے ہیں۔