ملتان: (رائیٹ ناؤنیوز) ایف آئی اے امیگریشن نے ملتان ائیرپورٹ پر کارروائی کرتے ہوئے عمرہ ویزے کی آڑ میں انسانی اسمگلنگ ناکام بنادی۔ ایک خاتون سمیت 2 مسافروں کو گرفتار کرلیا گیا ہے۔

ایف آئی اے کے ترجمان کے مطابق مسافر سعودی عرب جانے کے لئے عمرہ ویزے پر پہنچے تھے۔ امیگریشن کے دوران مشکوک حرکات پر انہیں روکا گیا اور پوچھ گچھ کی گئی۔

تحقیقات کے دوران مسافروں کے موبائل فونز اور دیگر ڈیجیٹل مواد سے کمرشل جنسی استحصال کے شواہد ملے ہیں۔ جنسی استحصال کے منظم نیٹ ورک کی تفصیلات بھی حاصل کرلی گئی ہیں۔

ابتدائی تحقیقات کے مطابق ایجنٹ نے عمرہ ویزے کی آڑ میں مسافروں کو سعودی عرب بھیجنے کی کوشش کی۔ مزید تحقیقات کے لیے موبائل فونز اور مواد کو تحویل میں لے لیا گیا ہے۔

واضح رہے کہ ایف آئی اے نے کمرشل جنسی استحصال اور انسانی اسمگلنگ میں ملوث دیگر عناصر کی شناخت کے لئے تحقیقات کا دائرہ وسیع کردیا ہے۔