واشنگٹن: (رائیٹ ناؤ نیوز) امریکا نے ایران پر نئی معاشی پابندیاں عائد کر دی ہیں۔ امریکی حکام کے مطابق یہ پابندیاں آبنائے ہرمز سے گزرنے والے تجارتی جہازوں سے رقوم وصولی پر لگائی گئی ہیں۔

امریکی محکمہ خزانہ کے مطابق دو ایرانی ادارے، آٹھ کمپنیوں اور آئل ٹینکروں پر پابندیاں عائد کی گئی ہیں۔ ان پر الزام ہے کہ وہ ایران کی تیل برآمدات اور مالی وسائل میں کردار ادا کر رہے تھے۔

حکام کا کہنا ہے کہ پابندیاں ایک مبینہ مالیاتی نیٹ ورک کو نشانہ بنا رہی ہیں۔ اس نیٹ ورک کے ذریعے تجارتی جہازوں کو میری ٹائم انشورنس خریدنے پر مجبور کیا جاتا تھا۔

امریکا کا دعویٰ ہے کہ یہ نظام پاسدارانِ انقلاب کو مالی وسائل فراہم کرنے کے لیے بنایا گیا تھا۔ امریکی اثاثے منجمد کر دیے گئے ہیں اور امریکی شہریوں کو ان سے لین دین کی ممانعت ہے۔

واضح رہے کہ امریکا اور ایران کے درمیان کشیدگی میں اضافہ ہو رہا ہے۔ حالیہ ہفتوں میں آبنائے ہرمز میں ایرانی تیل برآمدات نے تعلقات میں مزید تناؤ پیدا کیا ہے۔