راولپنڈی: (رائیٹ ناوٴ نیوز) حامد خان نے میڈیا سے گفتگو میں کہا کہ چھبیسویں ترمیم کو قبول نہ کرنے کے بعد ستائیسویں ترمیم کا سوال ہی پیدا نہیں ہوتا۔ انہوں نے کہا کہ سب جانتے ہیں کہ یہ سب کس کے حکم پر ہورہا ہے، جبکہ آزاد کشمیر میں حکومت کی تبدیلی کے مقاصد واضح نہیں ہیں۔ حامد خان نے مزید کہا کہ دونوں جماعتوں کو ستائیسویں ترمیم پاس کرنے کے لیے بٹھایا گیا ہے۔

حامد خان نے کہا کہ جو لوگ شاہ محمود قریشی سے ملے ہیں وہ بھگوڑے ہیں، جو پی ٹی آئی کو چھوڑ کر گئے انہیں پارٹی کے بارے میں بولنے کا کوئی حق نہیں۔ انہوں نے کہا کہ شاہ محمود قریشی سے ملاقات کی کوئی اہمیت نہیں اور چھبیسویں ترمیم کو واپس لے کر آئین کے مطابق ملک چلانے سے مسائل کا حل نکل سکتا ہے۔ انہوں نے مزید کہا کہ وہ عدالتی نظام سے ریلیف چاہتے ہیں اور کسی ڈیل کے خواہاں نہیں ہیں۔

حامد خان نے کہا کہ عدلیہ کی بے بسی کی وجہ سے چھبیسویں آئینی ترمیم کو چیلنج کیا گیا ہے، اگرچہ انہیں عدالتوں سے امید نہیں لیکن کوشش جاری رکھیں گے۔ انہوں نے یہ بھی کہا کہ ستائیسویں ترمیم کے حوالے سے اصول پر ہر کسی سے بات ہوسکتی ہے اور جو بھی اس ترمیم کی مخالفت کرے گا، وہ اس کے ساتھ ہیں۔