اسلام آباد: (رائیٹ ناؤ نیوز) وزیراعظم شہباز شریف نے کہا ہے کہ اللہ کے فضل سے ملک میں معاشی استحکام حاصل کرلیا گیا ہے۔ انہوں نے کہا کہ اس معاشی استحکام کے نتیجے میں عوام کو بجٹ کے ذریعے ریلیف دیا گیا ہے۔

بجٹ اجلاس کے بعد وزیراعظم نے قوم کا شکریہ ادا کرتے ہوئے کہا کہ ہر شہری نے مشکل حالات میں صبر و تحمل کا مظاہرہ کیا۔ انہوں نے کہا کہ قوم کی دعائیں اور کوششیں ہی کامیابی کی وجہ بنیں۔

وزیراعظم نے کہا کہ عوام نے مشکلات کا سامنا کیا اور ملکی معیشت کے استحکام کے لیے اہم کردار ادا کیا۔ ان کا کہنا تھا کہ اب خوشحالی کا وقت شروع ہوچکا ہے اور عوام کو ریلیف فراہم کیا جائے گا۔

انہوں نے مزید کہا کہ یہ بجٹ عوامی فلاح کے لیے ہے اور تنخواہ دار طبقے پر بوجھ کم کرنے کے لیے اقدامات کیے گئے ہیں۔ یہ بجٹ برآمدات، زرعی ترقی، صنعتوں اور سرمایہ کاری کے فروغ کے لیے ہے۔

یاد رہے کہ حکومت نے سرکاری اور نجی تنخواہ دار طبقے کی مشکلات کے پیش نظر ٹیکس میں کمی کی ہے تاکہ عوام کو براہ راست فائدہ پہنچ سکے۔