اسلام آباد: (رائیٹ ناوٴ نیوز) علیمہ خان نے کہا ہے کہ عمران خان کی ضمانت منظور ہونے پر انہیں فوراً الشفا اسپتال لے جایا جائے گا تاکہ ان کی آنکھ کا علاج کیا جا سکے۔ انہوں نے انسداد دہشت گردی عدالت میں پیشی کے بعد کہا کہ عمران خان کی رہائی کے لیے جسٹس سرفراز ڈوگر کیسز کی سماعت کریں۔

علیمہ خان نے سابق سپرنٹنڈنٹ جیل اڈیالہ غفور انجم کے خلاف مجرمانہ غفلت کے تحت مقدمہ دائر کرنے کا اعلان کرتے ہوئے حکومت پر خان صاحب کے ساتھ ناانصافی کا الزام عائد کیا۔ انہوں نے کہا کہ عمران خان کے ذاتی معالج کی غیر موجودگی میں ان کا معائنہ کیا گیا۔

انہوں نے کہا کہ محسن نقوی نے گارنٹی دی تھی کہ عمران خان کا علاج فیملی اور ڈاکٹروں کی موجودگی میں الشفاء اسپتال میں ہوگا، لیکن ایسا نہیں ہوا۔ علیمہ خان نے مزید کہا کہ ان کے خلاف سیاسی بنیادوں پر کیسز بنائے گئے ہیں اور اس طرح کی کارروائیاں جھوٹے سیاسی سسٹم کو نہیں بچا سکیں گی۔