نیویارک: (رائیٹ ناوٴ نیوز) اوپن اے آئی کی سابق محقق زوئی ہٹزِگ نے خبردار کیا ہے کہ چیٹ جی پی ٹی میں اشتہارات شامل کرنے کا منصوبہ صارفین کی ذاتی معلومات کے غلط استعمال کا سبب بن سکتا ہے۔ ان کا کہنا ہے کہ صارفین چیٹ جی پی ٹی کو قابل اعتماد دوست سمجھ کر حساس معلومات شیئر کرتے ہیں، جو عام سوشل میڈیا پوسٹس سے زیادہ نجی ہوتی ہیں۔

ہٹزِگ نے کہا کہ اگر اشتہارات اس ڈیٹا کی بنیاد پر چلائے جائیں تو صارفین کو غیر محسوس انداز میں متاثر کیا جا سکتا ہے، جس کے نتائج سمجھنا مشکل ہوگا۔ اوپن اے آئی نے کہا ہے کہ صارفین کی گفتگو کسی اشتہار دینے والے کے ساتھ شیئر نہیں کی جائے گی اور ڈیٹا فروخت نہیں ہوگا۔

ماہرین کا کہنا ہے کہ اگر اشتہارات آمدنی کا ذریعہ بن جائیں تو سسٹم صارف کو زیادہ وقت تک مشغول رکھنے کو ترجیح دے سکتا ہے۔ سروے سے ظاہر ہوتا ہے کہ زیادہ تر لوگ اشتہارات کے باوجود مفت اے آئی ٹول استعمال جاری رکھیں گے، جس سے معلوم ہوتا ہے کہ لوگ نجی معلومات کی حفاظت کے بارے میں فکرمند تو ہیں، مگر خدمات چھوڑنے کے لیے اتنے پرعزم نہیں۔