تہران: (مہر نیوز)  زعفران دنیا کی سب سے قیمتی جڑی بوٹیوں میں شمار ہوتا ہے جو پھول کے سرخ ریشوں سے حاصل کی جاتی ہے۔ اپنی سنہری رنگت، خوشبو اور منفرد ذائقے کے باعث اسے “ریڈ گولڈ” کہا جاتا ہے۔ ماہرین کے مطابق زعفران کی ابتدا قدیم ایران یا مشرقی بحیرہٴ روم سے ہوئی، تاہم ایران صدیوں سے اس کی سب سے بڑی کاشت گاہ رہا ہے۔

ایران میں زعفران زیادہ تر خشک یا نیم خشک علاقوں میں اگایا جاتا ہے۔ سب سے اہم صوبے خراسان رضوی اور خراسان جنوبی ہیں، جن میں تربتِ حیدریہ کو “ریڈ گولڈ کا دارالحکومت” کہا جاتا ہے۔ ایرانی زعفران اپنی گہری رنگت، خوشبو اور ذائقے کے لحاظ سے دنیا بھر میں شہرت رکھتا ہے۔

ایرانی زعفران کی مشہور اقسام میں سپر نگین، نگین، سرگل، پوشال اور دستہ شامل ہیں۔ سپر نگین زعفران سب سے قیمتی تصور کیا جاتا ہے جس کی رنگت کی طاقت ۲۵۰ سے زائد ہوتی ہے اور یہ لگژری مارکیٹوں میں استعمال ہوتا ہے۔ نگین زعفران ۲۲۰ سے ۲۵۰ کے درمیان رنگت کی طاقت رکھتا ہے جبکہ سرگل اور پوشال گھریلو استعمال میں زیادہ مقبول ہیں۔

زعفران طبی لحاظ سے بھی بے شمار فوائد رکھتا ہے۔ یہ اینٹی آکسیڈنٹس سے بھرپور ہے، دل کی صحت بہتر بناتا ہے، ذہنی دباؤ کم کرتا ہے، یادداشت اور ہاضمہ بہتر کرتا ہے، جبکہ جلد اور اعصاب کے لیے بھی مفید سمجھا جاتا ہے۔

تجارتی لحاظ سے ایران دنیا کا سب سے بڑا زعفران برآمد کنندہ ہے۔ سال ۲۰۲۲ میں ایران نے تقریباً ۲ لاکھ ۱۵ ہزار ۸۷۹ کلوگرام زعفران ۲۰۱.۷ ملین ڈالر مالیت کے ساتھ برآمد کیا۔ مارچ ۲۰۲۵ تک یہ برآمدات ۲ لاکھ ۱۴ ہزار ۳۰۰ کلوگرام تک پہنچ گئیں جن کی مالیت ۱۸۴.۷ ملین ڈالر رہی۔ متحدہ عرب امارات، اسپین اور چین ایرانی زعفران کے سب سے بڑے خریدار ممالک ہیں۔