لزبون: (رائیٹ ناوٴ نیوز) اونلی فینز کی سی ای او کیلی بلئیر نے بتایا ہے کہ کمپنی کے پاس دنیا بھر میں 40 کروڑ صارفین اور صرف 42 فل ٹائم ملازمین ہیں۔ نومبر میں ویب سُمت ٹیکنالوجی کانفرنس کے دوران انہوں نے کہا کہ کمپنی میں درمیانی سطح کے انتظامی عہدوں کو ختم کر کے تنظیمی ڈھانچے کو ہموار اور سیدھا رکھا گیا ہے۔

اونلی فینز کا بزنس ماڈل ملازمین کی قابلیت اور انفرادی ذمہ داری کو ترجیح دیتا ہے، جس کے باعث بڑا عملہ نہ ہونے کے باوجود کمپنی مؤثر طریقے سے چل رہی ہے۔ کیلی بلئیر نے بتایا کہ بھرتی کے دوران زیادہ تر رویے اور صلاحیت کو اہمیت دی جاتی ہے، تجربے کو نہیں۔

اونلی فینز، جو 2016 میں قائم ہوئی، سالانہ تقریباً 7 ارب ڈالر کا ریونیو حاصل کرتی ہے۔ یہ پلیٹ فارم تخلیق کاروں کو اپنے مداحوں کے ساتھ براہِ راست مواد شیئر کرنے کی اجازت دیتا ہے اور سبسکرپشن فیس وصول کرتا ہے۔

اگرچہ یہ پلیٹ فارم بالغ افراد کی تفریح کے لیے مشہور ہے، لیکن فنکار، موسیقار اور دیگر اثر و رسوخ رکھنے والے افراد بھی اسے استعمال کرتے ہیں۔ کیلی بلئیر نے کمپنی کو صرف بالغ مواد تک محدود نہ رکھتے ہوئے فنکاروں کے لیے بھی کھولا۔