لاہور: (رائیٹ ناؤنیوز) پنجاب میں جنگلی حیات، پرندوں، رینگنے والے جانوروں اور نباتات کے سروے کے ابتدائی نتائج جاری کر دیے گئے ہیں۔ اس سروے میں پنجاب اڑیال، چنکارا، دریائے سندھ کی ڈولفن، نیل گائے، پاڑہ ہرن اور کالا ہرن کی تعداد ریکارڈ کی گئی۔

سروے کے مطابق، پنجاب اڑیال کی تعداد 5 ہزار 128، چنکارا کی 1 ہزار 276، اور دریائے سندھ کی ڈولفن کی 540 ریکارڈ کی گئی۔ پرندوں میں سرمئی تیتر کے 92 ہزار 636 اور کالا تیتر کے 40 ہزار 526 پرندے شمار ہوئے۔

حکومتی عہدیداروں کے مطابق، سروے کے حتمی نتائج عوامی سطح پر جلد جاری کیے جائیں گے۔ وائلڈ لائف سروے کے دوسرے مرحلے کی تیاری جاری ہے جس میں مزید تصدیق کی جائے گی۔

یہ سروے انٹرنیشنل یونین فار کنزرویشن آف نیچر پاکستان اور پنجاب وائلڈ لائف اینڈ پارکس ڈیپارٹمنٹ کے اشتراک سے کیا جا رہا ہے۔ اس کا مقصد جنگلی حیات کی تعداد اور مسکن کا سائنسی جائزہ لینا ہے۔

یاد رہے کہ یہ منصوبہ اپریل 2025 میں شروع ہوا اور اس کی لاگت 53 کروڑ روپے ہے۔ سروے کے دوران جدید ٹیکنالوجی جیسے جی پی ایس اور ڈرونز کا استعمال کیا گیا۔