کراچی: (رائیٹ ناؤنیوز) ہوائی جہاز میں سفر کرنے والے مسافروں کو اکثر ٹیک آف اور لینڈنگ کے وقت سیٹ سیدھی کرنے کی ہدایت دی جاتی ہے۔ یہ ہدایت فضائی حفاظت کے اہم اصولوں میں شامل ہے، جس کا مقصد مسافروں کی حفاظت کو یقینی بنانا ہے۔

ماہرین کے مطابق فضائی حادثات کے زیادہ تر واقعات ٹیک آف اور لینڈنگ کے دوران پیش آتے ہیں۔ ان مراحل میں جہاز زمین کے قریب ہوتا ہے اور پائلٹ کے پاس کسی بھی ہنگامی صورتحال سے نمٹنے کے لیے وقت کم ہوتا ہے۔

ایئرلائنز ان حساس لمحوں میں حفاظتی اصولوں پر سختی سے عمل کراتی ہیں۔ بظاہر سادہ نظر آنے والی نشستیں دراصل حفاظتی نظام کا اہم حصہ ہوتی ہیں، جنہیں سخت ٹیسٹوں سے گزارا جاتا ہے۔

واضح رہے کہ ہوائی جہاز کے حادثے کی صورت میں جلد باہر نکلنے کے لیے بھی سیٹ سیدھی کرنا ضروری ہوتا ہے۔ نشست پیچھے جھکی ہو تو پیچھے بیٹھے افراد کے لیے باہر نکلنا مشکل ہو سکتا ہے۔

یاد رہے کہ جیسے ہی جہاز بلندی پر پہنچتا ہے، حادثات کا امکان کم ہو جاتا ہے، اس لیے نشست پیچھے کرنے کی اجازت دی جاتی ہے۔ لیکن ٹیک آف اور لینڈنگ پر حفاظتی اصول دوبارہ نافذ ہو جاتے ہیں۔